بيسألوا الرئيس الروسي فلاديمير بوتن مين مثلك الأعلى؟.. مين قدوتك فى الحياة؟.. فرد بجمله واحده.. الجاسوس السوفيتى زورغه.. ريخارد زورغه.. مين هو زورغه وليه بوتن بيعتبره مثله الأعلى؟.. هقولك..
قبل أسبوع كامل من غزو ألمانيا للاتحاد السوفيتى فى الحرب العالمية التانية.. واحد من أهم جواسيس المخابرات السوفيتية.. وصلهم معلومة بإن خلاص.. الجيش الألماني صدرت له الأوامر بغزو الأراضى السوفيتيه.. وان الغزو هيبدأ خلال أيام قليله.. بسرعة البرق كان تقرير المخابرات السوفيتية على مكتب الرفيق ستالين زعيم الاتحاد السوفيتى.. لكن المفاجأة ان ستالين مصدقش المعلومة.. مش بس كده.. ده شتم الجاسوس اللى جاب المعلومة.. وقال بالنص هذا الوغد يُنشئ المصانع والمواخير في اليابان ويدّعي أن ألمانيا ستغزو الاتحاد السوفيتى؟..
طبعا موقف ستالين مفهوم لأنه كان ماضى معاهدة عدم اعتداء مع هتلر.. لكن فى عالم السياسة والحروب.. تصرف ستالين ده مستوى عالي جدا من الغباء.. لأن مفيش صاحب بيتصاحب.. معروفة..
طيب هل فى دليل على الكلام ده.. أقولك طبعا فى.. كلام الجاسوس طلع صح.. وبدأ الغزو الألمانى المشهور بعملية بارباروسا فى 22 يونيو سنة 1941.. يعنى بعد أسبوع كامل من تحذير الجاسوس ده.. تخيل بقى لو كان ستالين سمع كلامه واستعد للجيش الألمانى خلال الأسبوع ده.. كانت الخساير السوفيتية هتقل كتير.. ده غير ان مسار الحرب كلها كان ممكن يتغير من بدايته.. الغريب ان نفس المعلومة اللى نقلها الجاسوس ده.. اللى هقولك اسمه وقصته دلوقتى.. نقلها بعد منه جواسيس تانيين برده تابعين للاتحاد السوفيتى.. منهم ظابط فى المخابرات الألمانية نفسها.. كان بيتجسس لحساب السوفيت.. هنجيبلك مين تانى علشان تصدق ان هتلر بيضحك عليك؟.. لكن برده ستالين مصدقش.. وهنا ملاحظتين مهمين..
الأولى ان أحيانا ديكتاتوريتك وغرورك كزعيم واحساسك بإن محدش بيفهم غيرك.. ممكن توديك فى داهية.. مش بس انت.. دى غالبا هتودى بلدك كلها ورا الشمس.. الملاحظة التانية ان الجاسوس ده قدر يخترق جهاز المخابرات الألمانى فى عز جبروته وقوته.. وقدر يوصل لمعلومه غزو الاتحاد السوفيتى مش قبلها بيوم ولا كام ساعه.. ده قبلها بأسبوع كامل.. حتى قبل ما ظابط المخابرات الألمانى نفسه - اللى بيتجسس لحساب السوفيت.. يقدر يوصلها.. وده معناه انه كان مطلع على صناعة القرار الألماني حتى قبل التنفيذ.. لذلك مش غريب أبدا انك تعرف دلوقتى بإن الجاسوس اللى هحكيلك حكايته النهارده.. هو المثل الأعلى للرئيس الروسي فلاديمير بوتن..
ريخارد زورغه اتولد فى أذربيجان واتنفذ فيه حكم الإعدام فى اليابان يوم 7 نوفمبر سنة 1944.. بعد ما ستالين باعه وقال معرفوش ولا ليه علاقه بالاتحاد السوفيتى.. رغم انه كان ممكن يبادله بأسرى يابانيين أو من قوات المحور.. لكن ستالين كان يبيع أبوه عادى ولا يفرق معاه.. لكن ورغم اعدام زورغه.. إلا إنه قدر يحفر اسمه فى تاريخ الجاسوسية للأبد.. للدرجه اللى تخلى الرئيس الروسي فلاديمير بوتن.. يعتبره مثله الأعلى..
زورغه اتولد لأب ألمانى وأم روسيه.. وخلى بالك من أبوه وأمه دول علشان هما مفتاح القصة كلها.. ومفتاح شغله فى التجسس بشكل عام.. بعد ما تم زورغه 3 سنين.. أبوه وأمه خدوه وعاشوا فى العاصمة الألمانية برلين.. بلد أبوه مفيهاش حاجه.. وبالتالى زورغه عاش وكبر فى ألمانيا.. يعنى مواطن ألمانى محدش يقدر يشك فيه.. خصوصا وانه انضم للجيش الألمانى لما تم 18 سنة.. واتصاب 3 مرات.. فزورغه بالنسبة لألمانيا بطل مفيش أحسن من كده.. لدرجه ان بعدها بشويه انضم للحزب النازى.. لك أن تتخيل انه كان عضو فى الحزب النازى وفى نفس الوقت واحد من أهم الجواسيس السوفييت.. وهحكيلك التفاصيل دى دلوقتى علشان تعرف ليه بوتن اختاره من بين كل الناس علشان يكون مثله الأعلى فى الحياة..
المهم زورغه لما اتصاب فى الحرب للمرة التالتة.. حالته الجسمانيه معدتش تسمح له بالحرب.. فاضطر انه يدور على حاجه تانيه يعملها.. فدرس اقتصاد وعلوم سياسية لحد ما خد درجة الدكتوراه فى العلوم السياسية من جامعة هامبورج..
لحد هنا الراجل ألمانى صرف.. لكن خلال فترة دراسته للعلوم السياسية اتأثر بالفكر الماركسي أو الشيوعى.. واتحول لواحد من أشد المؤمنين بيه والمدافعين عنه.. ولأن أمه روسيه.. فده طمن المخابرات السوفيتيه لدرجت انها جندته.. وبعد فترة تدريب محترمه فى مدارس المخابرات السوفيتيه.. كلفوه بتأسيس شبكة تجسس فى شنغهاى فى الصين.. ورغم انها كانت مهمه صعبه.. إلا إنه أسس الشبكة ونجح بشكل عظيم جدا.. فثقة المخابرات السوفيتية زادت أكتر فى زورغه.. فكانت الخطوه التانية انهم كلفوه بتأسيس شبكة تجسس فى اليابان.. وتحديدا فى طوكيو.. ليه؟ لأن اليابان كانت بتحتل اقليم منشوريا فى الصين.. وبالتالى فى قوات يابانيه متمركزة فى الصين تقدر فى أى وقت تهدد روسيا.. أو الاتحاد السوفيتى وقتها.. فكانت المخابرات السوفيته عاوزه تزرع حد فى قلب اليابان علشان تعرف اليابانيين ناويين على ايه بالظبط.. فبعتوا مين؟.. الجاسوس ريخارد زورغه..
المصادر
https://bit.ly/3rMOJ9Z
https://nyti.ms/3jZXx82
https://bit.ly/38iAKlC
https://bit.ly/3EBLfwc
#المواطن_سعيد #بوتن #زورغه
