بعد حرب اكتوبر.. دار حوار بين الرئيس السادات وبين أفراد أسرته.. ولاده وبناته يعنى.. قالهم بالنص.. عارفين يا ولاد مين أرجل 2 شفتهم فى حياتى؟.. مين يا والدى؟.. قالهم الملك فيصل ملك السعودية.. والرئيس هوارى بومدين رئيس الجزائر..
ليه يا والدى؟.. قالهم بتكلم مع الملك فيصل وبيسألنى هتحارب امتى؟.. فقولتله الحرب هتكون صعبه خصوصا اننا هنحارب على 3 جبهات.. مصر وسوريا والأردن.. وبالتالى الميزانية هتكون كبيرة منقدرش نتحملها.. فما كان من الملك فيصل إلا إنه قالى وقف.. ما تقول ميزانية.. انتوا بتروحوا تشتروا سلاحكم.. وبتبعتولنا الفواتير بنسدد.. سألته يعنى تقدروا تدعمونا بميزانية كام؟.. فرد عليه الملك فيصل وقاله ميزانية مفتوحة.. تقولى بتريد سيولة كام بنضعها لكم فى البنك؟..
أما الرئيس الجزائرى هوارى بومدين.. فيوم 2 أكتوبر لقيته بيكلمنى وبيسألنى ايه الأخبار؟.. جاهزين؟.. فالرئيس السادات قاله للأسف مش باين.. فسأله الرئيس الجزائرى وهو مخضوض.. ليه؟.. قاله الرئيس السادات المفروض السلاح كان يوصلنا من الاتحاد السوفيتى يوم 1 أكتوبر.. لكن موصلش.. ولما كلمنا الاتحاد السوفيتى نسأله ليه مبعتش السلاح.. رد علينا وقالنا ان تمنه لازم يندفع كاش علشان يتبعت.. فسأله الرئيس الجزائرى.. الاتحاد السوفيتى عاوز منكم كام؟.. فقاله الرئيس السادات عاوزين 100 مليون دولار كاش.. وطبعا احنا معناش المبلغ ده كاش علشان ندفعه.. وبالتالى شكلنا مش هنعرف نحارب.. وانتهت المكالمة.. الرئيس الجزائرى قفل التليفون مع الرئيس السادات بدون ما يعلق.. سمع المبلغ وقفل التليفون..
المهم المكالمة دى كانت بالليل.. دخل الرئيس السادات ينام.. لكن الرئيس الجزائرى منامش.. والساعة 6 الصبح.. فوجئ الرئيس السادات بظابط من رجالته داخل عليه يصحيه ويقوله تليفون مهم.. مين؟.. قاله الرئيس الجزائرى هوارى بومدين.. ألو.. قاله صباح الخير يا سيادة الرئيس.. فسأله الرئيس السادات خير ايه اللى حصل؟.. قاله أنا بكلمك من موسكو.. أنا بكلمك من الاتحاد السوفيتى؟.. بتعمل ايه عندك؟.. قاله بعد ما قفلت معاك التليفون امبارح فتحت البنوك الجزائرية وفتحت البنك المركزى ولميت الـ 100 مليون دولار.. وخدتهم فى طيارة وطلعت بيهم على موسكو.. أنا دفعت الفلوس كاش للاتحاد السوفيتى.. ولما قالى هيبعتولكم السلاح.. رفضت.. وقولتلهم مش همشى من هنا غير لما السلاح يسبقنى على مصر.. السلاح اللى الجيش المصرى عاوزه يتشحن على مصر قبل ما أركب طيارتى..
الرئيس السادات لسه بيشكره قاله متشكرنيش.. اتصل بقائد الجيش عندك خليه يجيبلك دلوقتى قائمة بنوع السلاح والكمية اللى انتوا محتاجينها.. وأنا بنفسى هنزل الميناء اللى هيتشحن منه السلاح.. علشان أتأكد ان اللى انتوا محتاجينه اتشحن لكم.. فبيقول الرئيس السادات لأولاده وهو بيحكيلهم على اللى حصل.. عارفين البرد فى موانئ موسكو شكله ايه؟.. لا يتحمله بشر.. ومع ذلك الرئيس هوارى بومدين وقف فى الميناء بنفسه زيه زى عمال الميناء علشان يتأكد ان السلاح اللى محتاجاله مصر هيتشحن لها زى ما طلبت.. هو ده الرئيس هوارى بومدين وهى دى الجزائر وهى دى قيمة مصر فى قلوبهم..
وسيدى المواطن خلينى أقولك.. ان كل اللى فات ده أقل حاجه فى حكاية النهاردة.. لأن اللى لسه هحكيهولك أكتر بكتير من اللى فات..
حضرتك هنا تقولى ثانيه واحده قبل ما تكمل.. هو الرئيس السادات ليه اتفاجئ لما الاتحاد السوفيتى طلب فلوس السلاح كاش؟.. أمال هو كان فاكر انه هيدفع تمن السلاح قسط ولا ايه؟.. أقولك ان طريقة دفع مصر تحديدا لتمن أى صفقة سلاح سوفيتى حتى من ايام الرئيس جمال عبد الناصر.. كانت بتتم بتسهيلات مختلفة.. خلينى أحكيلهالك..
مصر لما كانت تحب تشترى سلاح من الاتحاد السوفيتى كان على طول بيتخصم لها 50% من تمن السلاح.. حاجه زى تخفيض كده.. وهنا انت اوتوماتيك بتشتري بنص التمن.. طيب والنص التانى بتدفعه ازاى؟.. الاتحاد السوفيتى بعدها يديك قرض بقيمة الـ 50% الباقيين.. اللى مصر المفروض تدفعهم.. طيب هتسدد القرض ده ازاى؟.. بتسدده على أقل من مهلك على 15 سنة بفايدة 2%.. مش بس كده.. ده انت بتدفع أول قسط بعد فترة سماح.. يعنى بالبلدى كده لما ربنا يقدرك.. اللى هو انت حرفيا بتشترى السلاح ببلاش..
مش بس كده.. ده الجميل فى الموضوع ان فى العادى.. بدون خصم وبدون أى مساعده.. سعر السلاح الروسي أقل من سعر السلاح الأمريكى النص مثلا.. وبعدها الاتحاد السوفيتى بيعملك خصم 50% على النص ده.. فانت لو جيت تحسبها هتلاقى نفسك بتدفع ربع تمن السلاح الأمريكى.. الأهم انك بتدفع بالمصرى وبالتقسيط المريح.. وخلينى أديلك مثلا.. لو مصر هتشترى صفقة سلاح سعرها فى سوق السلاح 100 مليون دولار.. فبنبعت حد من عندنا مفيش فى جيبه دولار واحد.. بيروح للاتحاد السوفيتى من غير فلوس.. ياخد منهم قرض بقيمة ربع المبلغ.. اللى هو 25 مليون دولار.. ياخدهم من البنك السوفيتى باليمين ويديهم للجيش السوفيتى بالشمال ويرجع بالسلاح اللى هو عاوزه.. ويبقى يسدد المبلغ للبنك السوفيتى براحته وبالجنيه المصرى كمان.. شوفت الموضوع كان سهل ازاى!..
طيب هو الاتحاد السوفيتى كان بيعمل كده ليه؟.. كان عبيط مثلا.. لاقى السلاح فى الشارع؟.. أقولك طبعا لأ.. لكن دى الطريقة الوحيدة اللى هيكسبك بيها كحليف فى مواجهة الغرب.. ما الاتحاد السوفيتى لو مساعدكش.. مين اللى هيساعدك؟.. أمريكا.. وهو فاهم كده كويس.. فالحل الوحيد قدامه انه يديلك اللى محدش غيره يقدر يديهولك.. مفيش دولة فى العالم هتديلك سلاح ببلاش.. وبالتالى تفضل حضرتك طول الوقت محتاج للاتحاد السوفيتى.. وهكذا..
من المصادر
https://bit.ly/3RW1WsG
https://bit.ly/3OmPuPs
https://bit.ly/3PdjU89
https://bit.ly/3cpZM4i
https://bit.ly/3PVTk3x
#المواطن_سعيد #الجزائر #هوارى_بومدين
